Gen 46 | PMA | STEP | Sakini Siekob lah vasi tounah keil onen ka va mau en out Bersiba. En out enek, kei mumon sanien votut min Ahi koa Aesak, tata onen, va netan mini.

Genesis 46

Siekob Ral min Onen Keil Uva en Out Isip ka Ahi Sakin Keil Umai Avi Houlu

Senesis 46:1-7,28-30; 47:27-28

1 Sakini Siekob lah vasi tounah keil onen ka va mau en out Bersiba. En out enek, kei mumon sanien votut min Ahi koa Aesak, tata onen, va netan mini. 2 En vongien, Ahi selus mini en matil vovoien tai vit, “!Siekob! !Siekob!”

Siekob vit, “?O-o, inau ke li?”

3 “Inau Ahi, navi Ahi onen tata onom. Konametautei kovaha en out Isip. Numon vatiamal onom hemai hehi mari kantri tai. 4 Inau niha hetal minuk ka nikur koek en sise vaha en out Isip. Ka hekatau, nilah ris vatimal onom hemai ris ekok. Ka Siosep emok heoteh koe metom navong kimat.”

5 Navong Siekob mea ran out Bersiba, natnali keil aling kei ka titae keil ka ahin one keil en kat ten hos koa Asuv Houlu ten out Isip maeni ven keil. 6 Keil alah tirendan ese keil ka tounah keil koa alahi avong aro en out Kenan. Siekob va en out Isip ral min vatiamal onen: 7 natnali ka natnahin keil, ral min havinali keil.

28 Siekob sila Sudah va mulamu vahis Siosep keke vahisu mini en out Kosen. Navong arokol out enek, 29 Siosep vut en kat ten hos ka muloh va en out Kosen vahisu min tata onen. Navong luvisu, lukav kat keilu ka Siosep murang taveah emok. 30 Siekob viteni min Siosep vit, “Munak nimat kosa, nimat hetal min tomat veni nalesuk en metok keke komoul.”